[حلاها مبتليها]

بســــــــم الله الرحمن الرحـــــــــــــــــيم

اعود لكم بالجزء الثاني < تسمع بالتشوويق !

صز عاد مانتظرتو هالجزء بفارغ الصبر ؟؟
والله الظاهر ماحولي احد

*********

يوم الجمعه
الساعة 9 ونصف صباحا
صحينا من النوم وافطرنا < احلفي
وكنا ناوين على جزيرة بيننج وعندنا كذا وسيله
اما طيران داخلي يسمونه هناك فيري
او باص او تاكسي
المهم بعد عدة مشاورات مع رئيس مجلس الشورى الشيخ ابو عبدالعزيز قررت انا واياهـ نروح باص
ودنا نجرب ونستمتع وكثير مدحوهـ لنا

سألنا الريسبشن قالو روحوا محطة الباصات
محطة بودارايا
رحنا لهم قصينا تذاكر قالو الرحله بعد ربع ساعه ياسلام على توقيتنا الفانتاستك
للمعلومية المسافه بين كوالالمبور وبيننج تقريبا اربع ساعات
والرابط جسر يشبه الجسر المعلق

وياسلام على باصاتهم وش كراسي وش ركاده بالسواقه وش نظافه وش اخلاق
الكرسي من كبره يجلس فيه بعير مو باصاتنا اللي يالله تحشر عمرك عشان تجلس ومافيه امل تنام

مشى الباص
اترك الباقي للصور








فجأة
امطررررررت





وقفونا عند محطه للي بيصلي الظهر
نزلنا صلينا
وش اقول لكم اقسم بالله محطاتهم تقل فنادق من نظافتها وخدماتها



وهذا باصنا



صلينا ومشينا







واخــــــــيرا
وصلنا جزيرة بيننج





ودايركت خذينا تاكسي ورحنا ندور فندق
اخذنا فندق ( Copthorn Hotel) حلو وفخم
بس عيبه كان بعيد عن الستي سنتر وهذا الشي ماكتشفناه الا بعد ماسكنا
كان كل شي بعيد يعني الاسواق والحدائق يبي لنا ربع ساعه او نص ساعه
طبعا لاننا كنا نجهل هالشئ ومامعنا خريطه توضيحيه للجزيرة

وهذي صور الفندق


وهذا بعلي حبيب قلبي عند مدخل الفندق



وهذا من داخل مع الرسبشن






وهذي الغرفه




وهذ اطلالة الغرفه على البيتش





وهذ الاطلاله على المدينه



طبعا وصلنا متاخر شووي

ونزلنا نتغدا بمطعم هندي
بس ماعجبني !



بعدها رجعنا الفندق صلينا وطلعنا للنايت ماركت
هذا سوق ليلي يبدا من الساعه 7 مساء ويقفل عالساعه 12




يوم السبت
اخذنا تاكسي جوله يوم كامل ب 200 رنجت يعني حول 220 ريال
وهم يعرفون الاماكن السياحيه يعني ماتعبنا بالبحث والسؤال


حديقة التوابل


حديقه كامله فيها جميع انواع التوابل
وتوابلهم بعد ما شميت ريحتها عرفت ان اللي عندنا اشباهـ التوابل
ياناس ريحة المسمار والهيل والفلفل والزنجبيل شي عجيب
تشم الريحة على بعد كيلو

اترككم مع الصور











وهذا المتجر للي يبي يشتري



بعدها طلعنا لمتاجر الشوكــولاهـ والقهــــوة


متجر الشوكولاهـ





جميع انواع الشوكولاته


تبي بالموز ؟



حتى لو تبي بالفلفل الاحمر .. عادي ترا .. عندهم



طبعا هذا شرينا منه كميه
وهسترنا بالشعب اللي هنا
كل من اكله حمر وجهه و اخذ فنجال قهوه على باله بيبرد يقوم يزيد عليه
< انواااع النذاله


متجر القهووووة




ياسلااااااااااااااااااااااااااام على هيك محلات
شي يفتح النفس
تقهوينا عندهم لين مخمخنا صح
طبعا هم مايقصرون ويضيفونك انواااع القهوة والشاااي











بعدها طلعنا
مرينا جامع كبير وصلينا



الحديقه

ترا لها اسم بس نسيت والله وش اسمها









بالليل طلعنا عالسوق الليلي

[حلاها مبتليها]

*************


الاحــــــد

اخذنا تاكسي برضه جوله يوم كامل
طلعنا لهضبة بيننج يسمونها بوكيت بندارا بلغتهم



طبعا هي عباره عن عربة قطار تستوعب يمكن 15 راكب وتطلع مدر ي كم كيلو بعدين تنزلنا ونطلع على عربه ثانيه تكمل المشوار للهضبه فوووق







هذي صورة للاطلالة واحنا بالمحطه الصغيره اللي بالنص





صور لجزيرة بيننج من اعلى الهضبة

شوفو الجسر الرابط بين كوالالمبور وجزيرة بيننج
يشبه الجسر المعلق حق الدخل بس حق الدخل احلى اطلاله وجو .. والا ..؟؟



من زاوية اخرى



وهنا جلسنا واخذنا شراب حليب جوز الهند
تكرررم النعمه ماحبيته ابد ..
نفس طعم البلح ..





جلسنا نلف ساعه بعدين نزلنا



حديقة الفواكه

طلعنا لها وطريقها كان شوي بعييييد
بس حلوة

هذا مرشدنا يحكي لنا عن الفواكه والفوائد لكل فاكهه
وبالذات الفواكة الغريبة



بعدها ودونا بوفيه فواكه تختار اللي تبي وتختار أي عصير واجلس وفالك طيب ..



زهرة الميكي مااوس
شكلها يشبه الميكي ماوس



اناناس



دارقون فروت .. طعمها يشبه الكيوي بس احلى



قبل النضج



بعد النضج



موز بس مو موزنا
هذا ترا بحجم الصغنون يعني توهـ مانضج
يقول اذا نضج يصير طوله ذرااااع .. يمه !!



دوريان فروت ( ملكة الفواكه )



صور لحديقة الفواكه









الشلالات

نزلنا من حديقة الفواكه ونزلنا هنا











بعدها كان قريب المغرب
اخذنا غدانا وطلعنا البحر
طبعا غدانا ياهااويها موب كبسه كانت سندوتشات فلافل



تشوفون اللمة هناااااااااااااااااك؟؟



تتوقعون ليش ؟


عريس وعروسته جايين يتصورون عند البحر
ومعاهم كلبهم !! واهلهم

وبكذا يكون انتهى اخر يوم في بيننج

صحينا يوم الاثنين وجهزنا العفش وقصينا تذاكر ومشينا
كان يوم ممطر رائع



و
الى
جنـــــــــــتنج


ترقبوني بالجزء المقبل

اختكم
حــو حــو

[درر]

هلابكـ أم الشيخ عبدالعزيز..
والله تبغين الصراحة ننتظر وكلنا شوق لرحلتكـ
ماشاء الله تباركـ الرحمن رحلة موفقة مع من تغلين..

بالله وش يحسون فيه
تقبلي مروري ..
درر..

[جوري]

حوحو..
وش هالحركات..وحاطتنا بالجزء الاول الاشياء اللي مدري وش تبي..
يااختي وش هالزين..
هذي الطبيعة والا بلااش..
يااعليهم طبيعة..بحر..جو..فواكه..خضرة..بهارات وش اللي عندنا..
لا ويقولون بحر الشرقية..من زين بحرهاا. ولاشئ عند هذي..


يااختي لو امدح الى بكرة والله مااخلص..شئ شئ من جد..
عجزت أكتب شئ..




حوحو..

يعطيك العاافية يالغلا..وننتظر الجزء الثاالث على أحر من الجمر..

[حلاها مبتليها]

”	المشاركة الأصلية كتبت بواسطة درر هلابكـ أم الشيخ عبدالعزيز.. والله تبغين الصراحة ننتظر وكلنا شوق لرحلتكـ ماشاء الله تباركـ الرحمن رحلة موفقة مع من تغلين.. بالله وش يحسون فيه تقبلي مروري .. درر..

درر

الله يسلمك عيووني

مدري وش يحسون بس الاكيد كانوا مبسوطين

[حلاها مبتليها]

”

المشاركة الأصلية كتبت بواسطة جوري حوحو.. وش هالحركات..وحاطتنا بالجزء الاول الاشياء اللي مدري وش تبي.. يااختي وش هالزين.. هذي الطبيعة والا بلااش.. يااعليهم طبيعة..بحر..جو..فواكه..خضرة..بهارات وش اللي عندنا.. لا ويقولون بحر الشرقية..من زين بحرهاا. ولاشئ عند هذي.. يااختي لو امدح الى بكرة والله مااخلص..شئ شئ من جد.. عجزت أكتب شئ.. حوحو.. يعطيك العاافية يالغلا..وننتظر الجزء الثاالث على أحر من الجمر..

جوريتنا

ياقلبي انا امشي بترتيب الرحله بالايام
واكيد العاصمة مو مثل الجزر والمرتفعات

وش رأيك عاد .. ماتبين شهر عسلك فيها ؟

[جوري]

”	جوريتنا ياقلبي انا امشي بترتيب الرحله بالايام واكيد العاصمة مو مثل الجزر والمرتفعات وش رأيك عاد .. ماتبين شهر عسلك فيها ؟

حوحو..
كأنك جاالسة معنا ..وأحنا نشووف الصور..
هو مو شهر عسل ووبس..الا بسكن هنااك..

[مشاعل**]

ماشاء الله حلاهـا

روع Xروعه..

عيشتنـا جو

يعطيك العـافيـه

[الخافي أعظم]

ام عبدالعزيز

عز الله ما قصرتي حللتي الرحله تحليل
وماشاء الله الصور
عقبال ما نشوف عبدالعزيز معاكم

الله يوفقكم اختي

[طبيب الروح]

”	المشاركة الأصلية كتبت بواسطة حلاها مبتليها وهذي الغرفه

الأخت حلاها

بكل أمانه شي أكثر من راااااائع .. طبيعه خلابه جو في قمه العـــذوبه وعدسه متألقه .

بس في إستفسار ..! ممكن

أبي أعرف شي واحد الدائره اللي على الشباك وش هي .؟ وش سالفتها ..؟

يعطيك العافيه وبنتظار الجزء الثالث ..

[mooooooooooooooon]

::

حلآآهآآ صوور ولآ احلى
واحلى من الجزء الأول بكثييييييييييييير
يعطيك الف عآفيه

بس في بعض الصور احس مآلهآ دآعي ليتك مآحطيتيهآ


موفقه خيتوو
بانتظآر الجزء الثآلث يآلغآليه ..’

::

[مساعد]

ماشاء الله اختي حلاها كل صور احلى من الثانيه
بس ما تلاحظي شي !!
انك راكبه قدام في الباص

بس من جد صور تفتح النفس الله يعطيك الف عافيه

وتم نقل الموضوع في الملتقى لحين تفاعل الأعضاء فيه

لا هنتي اختي

[حلاها مبتليها]

”	المشاركة الأصلية كتبت بواسطة مشاعل** ماشاء الله حلاهـا روع Xروعه.. عيشتنـا جو يعطيك العـافيـه

مشاعل

هلا بك والاروع تشريفك يالغلا

[ع ـذبة الروح]

::




::



::




::





آرمووووني هنآآ ولآ عآد أعرفكم ولآتعرفوني انسوووني خلآص

يآلله نعيم الجنة بس ..

حلاها ماشاء الله كل صورة تقول الزين عندي عليهم طبيعة تجنن سبحان الله

والمعآريس ان شاء الله بسوي زواجي مثلهم بحط بدل الكلب قطوه ..

شسمه يائمر فيه صورة مش ولا بد ترا فيه عزابيه في المنتدى لاتاخذين ذنبهم .. احذفيهآ أزين ..

بإنتظآر الجزء القآدم ..
عوآفي
::

[حلاها مبتليها]

”	المشاركة الأصلية كتبت بواسطة الخافي أعظم ام عبدالعزيز عز الله ما قصرتي حللتي الرحله تحليل وماشاء الله الصور عقبال ما نشوف عبدالعزيز معاكم الله يوفقكم اختي

خااافي

الله يسلمك اخوووووي

وعبدالعزيز بامر الله السنه الجايه وهو معانا