[موجة حزن]

الدنيا تدور

ياخسارة كيف تبنى هـ القصور
ياخسارة كيف تبنى بالظلام

ياخسارة كيف نبعثها عطور
والحقيقة خانت حروف الكلام

دمعتي تجرح وبالتالي تجور
تسلب احلامي وترميني عظام

في معاناتي وبكتبها سطو
يمكن حروفي تعدلها تمام

للأسف حلم الأخوة به فتور
واشتكى بعد الأسى شح المقام

الصديق اللي هقيته لي جسور
فاض سيله ولا بقى الا هدام

هد حيلي وابتهج فيه السرور
وابتهج قلبه وغنى له حمام

طبع خاين لعنبوا حظ(ن) عثور
ما كشفته قبل يرميني سهام

والأصيلة كملت باقي الكسور
تحسبني غافي(ن) بأحلى غرام

لا وربي يا اصيلة يا (بحور)
ما بنيت العز بأحلام الهيام

رافع(ن) راسي على مر العصور
شيمتي ابني لها قصر وخيام

الوفاء طبعي ولا فيني قصور
ما خذ العزه من أجدادي وسام

والنذل لو هام تكشفه الشهور
ما يفوز الكذب لابد انهزام

ما عرفت شلون بوصفها شعور
هي حلال اليوم تكتب او حرام

هي جذوع الصمت ولا هي جذور
هي دروب(ن) شايكه ولا سلام

والأكيد اني على قلبي بثور
بصرخ بعالي صراخي للأنام

موقفي واضح ترى الدنيا تدور
ولا يغرك (صاحبي) جفن(ن) ينام

الأسد لو نام ما يخشى النمور
كلها تخشى تباري به خصام

اتأثر بس تبقى لي أمور
رافع(ن) راسي رغم ذاك الغمام

العزى ربي على المخطي غفور
ايه بسامح والعفوا طبع الكرام

والنهايه انكشف ساس القصور
دامها تبنى وتعلى بالظلام

اخوكم - مســاعد


موجة