( 07-09-2018, 12:16 PM )
#159
:
البارحه حزني تعدى حدوده
والهم نوّخ بين الاضلاع ذوده
بس اتقلب كن بالروح جمره
يزودها بين الضماير وقوده
سهرت لين الشمس بيّن ضياها
والدمع فيّض بالنواظر سدوده
عليك ياسمح المحيا اخطي
من وافر احزاني مشاعر ودوده
اخطها وامسح واعيد الكتابه
فكري من الهاجوس كثرت قيوده
عبدالعزيز البيت يشكي وداعك
اصبح مع الاطلال يفرض وجوده
ياجار وينك ضيّق الحال صدري
البيت من عقبك ظلامه يسوده
ياجار وينك كلما جيت اعدي
من عند بابك زاد همي ركوده
فقدت زولك وابتسامة حضورك
فقدت صوتك وابتهاجة ردوده
يالله تعظم بالاجر مافقدنا
ويالله عسى قبره جنانك تزوده
في جنة الفردوس تبني مقرّه
ويقطف مع الابرار طيّب وروده
الموت حق وكلنا بالنهايه
لابد نستقبل مواكب وفوده
ذي سنّة الخالق عليها مشينا
يرضى بها المؤمن ويبذل جهوده
..
|